डिभिजनल वन अधिकृतसँगै अनुकूल कर्मचारीको सरुवा

राष्ट्रिय

शनिबार, असोज १७, २०८३

डिभिजनल वन अधिकृतसँगै अनुकूल कर्मचारीको सरुवा

सञ्जय कार्की
रौतहट, १७ असोज । मधेश प्रदेशका डिभिजन वन कार्यालयमा हुने कर्मचारी सरुवा–पदस्थापनमाथि प्रश्न उठाउँदै आएको गुनासो पछिल्लो सरुवा विवरण सार्वजनिक भएसँगै थप पेचिलो बनेको छ । डिभिजनल वन अधिकृत जहाँ सरुवा हुन्छन्, त्यही कार्यालयमा उनीसँग काम गरेका वा निकट मानिएका कर्मचारीसमेत पुग्ने गरेको देखिएपछि यो संयोग मात्र हो कि नियोजित कर्मचारी व्यवस्थापन ? भन्ने प्रश्न वन प्रशासनभित्र उठेको छ । मधेश प्रदेश वन तथा वातावरण मन्त्रालयले २०८३ असोज १४ गते सार्वजनिक गरेको वन सेवा, जनरल फरेष्ट्री तथा स्वायल एण्ड वाटर कन्जर्भेसन समूहअन्तर्गतका वन अधिकृत, भू–संरक्षण अधिकृत तथा सातौँ र आठौँ तहका कर्मचारीको सरुवा विवरणले यस्तो प्रश्नलाई थप बल दिएको कर्मचारीहरूको भनाइ छ ।

रौतहट सरुवामा पहिलो प्रश्न

गत भदौ ५ गते डिभिजन वन कार्यालय पर्साबाट रौतहट सरुवा भएका डिभिजनल वन अधिकृत मञ्जुर अहमदसँगै अधिकृत राकेश रञ्जन र सन्दिप पटेल पनि रौतहट सरुवा भएका छन । एउटै कार्यालय प्रमुख परिवर्तन हुँदा उनीसँगै काम गरेका कर्मचारी पनि अर्को कार्यालयमा पुग्नु सामान्य प्रशासनिक प्रक्रिया अन्तर्गत पर्न सक्छ तर यस्तो आवागमन पटक–पटक र एउटै ढाँचामा दोहोरिएको हो कि होइन ? भन्ने प्रश्न भने सरुवा अभिलेखको तुलनात्मक अध्ययनले आफु अनुकुल रोजिएको देखिन्छ ।

सर्लाही–धनुषा सरुवाले थप्यो अर्को प्रश्न

डिभिजन वन कार्यालय सर्लाहीबाट धनुषा सरुवा भएका डिभिजनल वन अधिकृत सन्तोष झासँगै अधिकृत हिरोई चौधरी र सागर बस्याल पनि धनुषा सरुवा भएका छन् । उता धनुषाबाट सर्लाही सरुवा भएका डिभिजनल वन अधिकृत विनोद सिंहसँगै अधिकृत अनिल साहको पनि सरुवा भएको छ । यी सरुवाहरूलाई छुट्टाछुट्टै हेर्दा सामान्य प्रशासनिक निर्णय देखिन सक्छ तर एउटै डिभिजनल वन अधिकृत र उनीसँग सम्बन्धित कर्मचारीको सरुवा इतिहासलाई कार्यालयगत रूपमा जोडेर हेर्ने हो भने कर्मचारी छनोटको आधार के थियो ? आवेदन प्राथमिकता कसरी मूल्यांकन गरियो ? र एउटै समूहका कर्मचारीहरू पटक–पटक एउटै अधिकृतसँगै किन देखिन्छन् ? भन्ने प्रश्नको जवाफ खोज्नुपर्ने देखिन्छ ।

बारा हुँदै धनुषासम्म एउटै कर्मचारी ?

यसअघि डिभिजनल वन अधिकृत विनोद सिंह बारा कार्यरत रहँदा उनीसँग कार्यसम्बन्ध रहेका भनिएका कर्मचारीलाई समेत उनीसँगै धनुषा सरुवा गरिएको दाबी गरिएको छ । विगतका सरुवा विवरण हेर्ने हो भने सरुवामा सीमितता भन्दा पनि नीयतमा प्रश्न उठेको छ ।

मधेश प्रदेश वन तथा वातावरण मन्त्रालयका निमित्त सचिव हेमन्त साहले भने सरुवा–पदस्थापन मापदण्डअनुसार नै गरिएको बताउनु भयो ।