रौतहटमा पोखरीमा डुबेर २८ वर्षीय युवकको मृत्यु

स्थानीय

शनिबार, असोज १७, २०८३

रौतहटमा पोखरीमा डुबेर २८ वर्षीय युवकको मृत्यु

रौतहट, १७ असोज । रौतहटको फतुवा विजयपुर नगरपालिकामा पोखरीमा डुबेर एक युवकको मृत्यु भएको छ। फतुवा विजयपुर नगरपालिका–१ बैरगिनिया टोलमा स्थानीय अरविन्द यादवको पोखरीमा सोही स्थानका २८ वर्षीय राजेश दास मृत अवस्थामा फेला परेका हुन्। दासलाई पोखरीमा घोप्टो परेको अवस्थामा देखेपछि स्थानीयले आज बिहान करिब १०ः०५ बजे इलाका प्रहरी कार्यालय सन्तपुर लक्ष्मिनियामा खबर गरेका थिए। सूचना पाएलगत्तै प्रहरी नायब निरीक्षक विनोद पासवानको नेतृत्वमा प्रहरी टोली घटनास्थलमा पुगेको थियो। त्यसपछि इलाका प्रहरी कार्यालय लक्ष्मिनिया विजयपुरका प्रहरी निरीक्षक रादेश कुमार खत्रीको नेतृत्वमा घटनास्थल अनुसन्धान तथा कानुनी प्रक्रियाका लागि थप टोली खटिएको प्रहरीले जनाएको छ। घटनाबारे थप अनुसन्धान भइरहेको प्रहरीले जनाएको छ।