मधेसमा आर्थिक बेथिति नियन्त्रण गर्न ठोस कदम चालेको अर्थमन्त्रीको दाबी

स्थानीय

शुक्रबार, भदौ २६, २०८३

मधेसमा आर्थिक बेथिति नियन्त्रण गर्न ठोस कदम चालेको अर्थमन्त्रीको दाबी

रौतहट २६ भाद्र
मधेस प्रदेशका अर्थमन्त्री युवराज भट्टराईले प्रदेश सरकारमा देखिएको आर्थिक बेथिति नियन्त्रण गर्दै सुशासन र विकासलाई प्राथमिकता दिएको दाबी गरेका छन् । कार्यकालको सय दिन पूरा भएको अवसरमा आयोजित पत्रकार सम्मेलनमा मन्त्री भट्टराईले रकमान्तर तथा थप निकासा ५३ दशमलव ५७ प्रतिशत र असार महिनाको रकमान्तर ९५ दशमलव ९६ प्रतिशत घटाइएको जानकारी दिए । कानुनविपरीत माग गरिएका १२० वटा फाइल फिर्ता गरी अनावश्यक आर्थिक चलखेल नियन्त्रण गरिएको उनको भनाइ छ । उनका अनुसार बजेट प्रविष्टि सम्बन्धित मन्त्रालयबाटै गर्ने व्यवस्था गरिएको, स्रोत सुनिश्चितता नभएका ठेक्का तथा काममा रोक लगाइएको र स्थानीय तहको अनुदान रातो किताबसँगै हस्तान्तरण गर्ने व्यवस्था मिलाइएको छ । अर्थ मन्त्रालयको कर्मचारी दरबन्दी ३२ प्रतिशत घटाइएको, लामो समय एउटै कार्यालयमा कार्यरत ७६ जना लेखा अधिकृत तथा लेखापालको सरुवा गरिएको र एक कर्मचारीलाई एक कार्यालयको जिम्मेवारी दिने व्यवस्था लागू गरिएको मन्त्री भट्टराईले बताए । त्यस्तै, १ करोड रुपैयाँभन्दा कमका नयाँ योजना र नयाँ सवारीसाधन खरिदमा रोक लगाइएको तथा कुल योजना संख्या २७ हजार ४०४ बाट घटाएर १५ हजार ८०८ मा सीमित गरिएको उनले जानकारी दिए । स्थानीय तहबाट प्राप्त हुनुपर्ने करिब २० करोड रुपैयाँ राजस्व प्राप्त गर्नुका साथै राजस्व संकलन र प्रदेश सञ्चित कोषमा दाखिला प्रणालीमा सुधार गरिएको मन्त्री भट्टराईको दाबी छ ।