मौलापुरमा हाकिम र लेखापाल नहुँदा सेवा प्रवाह प्रभावित

स्थानीय

शुक्रबार, भदौ २६, २०८३

मौलापुरमा हाकिम र लेखापाल नहुँदा सेवा प्रवाह प्रभावित

रौतहट २६ भाद्र
रौतहटको मौलापुर नगरपालिकामा लामो समयदेखि प्रमुख प्रशासकीय अधिकृत र लेखापाल नहुँदा प्रशासनिक काम, विकास निर्माण तथा अत्यावश्यक सेवा प्रभावित भएको छ । नगरपालिकाको खाता सञ्चालन हुन नसक्दा कर्मचारी तथा शिक्षकले दुई महिनादेखि तलब पाउन नसकेको, विद्युत्, विवाहलगायतका भुक्तानी रोकिएको र फोहोर व्यवस्थापनसमेत प्रभावित भएको स्थानियले बताइएका छन । त्यसैगरी नगरपालिकाले निर्माण गरेको नाला जाम हुँदा सरसफाइमा समस्या देखिएको तथा एम्बुलेन्स सेवा पनि बन्द रहेको स्थानियले बताएका छन । त्यस्तै, इन्टरनेटको बक्यौता भुक्तानी हुन नसक्दा लाइन काटिएपछि वडा कार्यालयबाट प्रदान हुने विभिन्न सेवा प्रभावित भएको जनाइएको छ । पछिल्लो ६ महिनामा नगरपालिकामा प्रमुख प्रशासकीय अधिकृत जम्मा ४० दिन मात्रै कार्यालयमा उपस्थित भएर काम गरेको स्थानीय स्रोतको दाबी छ । यस अवधिमा तीन जना उपसचिव तहका प्रमुख प्रशासकीय अधिकृत फेरिए पनि प्रशासनिक नेतृत्व स्थायी हुन नसकेको बताइएको छ । गत असारमा गरुडा नगरपालिकाबाट मौलापुरमा सरुवा गरिएका उपसचिव नीलम कुमार न्यौपाने भदौ ५ गतेदेखि कार्यालयमा उपस्थित नभएको स्रोतको भनाइ छ । प्रमुख प्रशासकीय अधिकृतको अभावका कारण असार मसान्तमा नगरपालिकाको करिब ७५ प्रतिशत बजेट फ्रिज भएको समेत स्थानियले दाबी गरेको छ । लामो समयसम्म प्रशासनिक नेतृत्व विहीन हुँदा सेवा प्रवाह र आर्थिक कारोबार प्रभावित बनेपछि संघीय मामिला तथा सामान्य प्रशासन मन्त्रालयको भूमिकामाथि समेत प्रश्न उठेको छ । नगरपालिकाको प्रशासनिक नेतृत्व र लेखापालको तत्काल व्यवस्था गरी रोकिएका सेवा तथा भुक्तानी सुचारु गर्न स्थानीयवासीले माग गरेका छन् ।