सामुदायिक वन उपभोक्ता महासंघ रौतहटद्धारा विपद् प्रभावितका लागि १ लाख १ सय १५ रुपैयाँ राहत सहयोग

स्थानीय

मंगलबार, भदौ २३, २०८३

सामुदायिक वन उपभोक्ता महासंघ रौतहटद्धारा विपद् प्रभावितका लागि १ लाख १ सय १५ रुपैयाँ राहत सहयोग

रौतहट २३ भाद्र
रसुवा, नुवाकोट, धादिङ, चितवन लगायतका जिल्लामा २०८३ भदौ १० गते आएको भीषण बाढी तथा प्राकृतिक विपद्बाट प्रभावित परिवारका लागि रौतहटबाट राहत सहयोग गरिएको छ । सामुदायिक वन उपभोक्ता महासंघ नेपाल, जिल्ला महासंघ रौतहटको समन्वयमा जिल्लाका विभिन्न सामुदायिक वन उपभोक्ता समूह तथा व्यक्तिहरूबाट स्वस्फूर्त रूपमा संकलन गरिएको १ लाख १ सय १५ रुपैयाँ प्रधानमन्त्री दैवी प्रकोप उद्धार कोषमा जम्मा गरिएको महासंघले जनाएको छ । महासंघले विपद्मा परी ज्यान गुमाउनेहरूप्रति भावपूर्ण श्रद्धाञ्जली अर्पण गर्दै शोकसन्तप्त परिवारजनप्रति समवेदना व्यक्त गरेको छ। साथै घाइतेहरूको शीघ्र स्वास्थ्यलाभको कामना गर्दै विपद् प्रभावित परिवार तथा समुदायप्रति ऐक्यबद्धता जनाएको छ । राहत रकमका लागि योगदान गर्ने सम्पूर्ण सामुदायिक वन उपभोक्ता समूह, सामुदायिक वन तथा सहयोगी व्यक्तिहरूप्रति महासंघले धन्यवाद तथा आभार व्यक्त गरेको छ । महासंघले विपद्को कठिन घडीमा सामूहिक सहयोग, सहकार्य र ऐक्यबद्धताले प्रभावित परिवारमा राहत तथा आशा प्रदान गर्ने विश्वास व्यक्त गरेको छ ।