चन्द्रनिगाहपुरको माउन्ट एभरेस्ट आवासीय माध्यमिक विद्यालयमा खेलकुद सप्ताह सुरु

स्थानीय

आइतबार, कार्तिक १६, २०८३

चन्द्रनिगाहपुरको माउन्ट एभरेस्ट आवासीय माध्यमिक विद्यालयमा खेलकुद सप्ताह सुरु

रौतहट १५ कार्तिक
रौतहटको चन्द्रपुरस्थित माउन्ट एभरेस्ट आवासीय माध्यमिक विद्यालयले आजदेखि खेलकुद सप्ताह सुरु गरेको छ । विद्यार्थीहरूको शारीरिक, मानसिक तथा व्यक्तित्व विकास गर्ने उद्देश्यले विद्यालयले खेलकुद सप्ताह आयोजना गरेको हो । खेलकुद सप्ताह अन्तर्गत विद्यालयमा अध्ययनरत विद्यार्थीहरूबीच विभिन्न विधाका खेलकुद प्रतियोगिता सञ्चालन गरिने विद्यालयले जनाएको छ । कार्यक्रमको उद्घाटन गर्दै प्रतिनिधिसभा सदस्य गणेश पौडेलले खेलकुदले मानिसलाई जित र हार दुवैलाई सहज रूपमा स्वीकार गर्न सिकाउने बताउनुभयो । खेलमा सफलता र असफलता दुवै स्वाभाविक प्रक्रिया भएकाले त्यसलाई सामान्य रूपमा लिन सक्नुपर्ने उहाँको भनाइ थियो । खेलकुदले अनुशासन, धैर्यता र सकारात्मक सोचको विकास गर्दै व्यक्तित्व निर्माणमा महत्वपूर्ण भूमिका खेल्ने उहाँले उल्लेख गर्नुभयो । कार्यक्रममा निजी तथा आवासीय विद्यालय अर्गनाइजेसन नेपाल (प्याब्सन) का केन्द्रीय उपाध्यक्ष दीपक रेग्मीले प्रतियोगितामा सहभागी विद्यार्थीहरूलाई संयमित, अनुशासित र खेल भावनाका साथ प्रतिस्पर्धा गर्न आग्रह गर्नुभयो ।
त्यस्तै चन्द्रपुर क्रिकेटका संस्थापक देवराज कार्कीले पछिल्लो समय रौतहट खेलकुदका लागि उर्वर भूमि बन्दै गएको बताउँदै स्थानीय स्तरमा खेलकुद गतिविधि बढ्दै जानु सकारात्मक भएको धारणा राख्नुभयो । रौतहट जिल्ला फुटबल संघका अध्यक्ष भगवान् दर्लामीले खेलकुद क्षेत्रको विकासका लागि स्थानीय तथा प्रदेश सरकारले आवश्यक बजेट विनियोजन गर्नुपर्नेमा जोड दिनुभयो ।
नेपाल पत्रकार महासंघ रौतहटका अध्यक्ष सञ्जय कार्कीले शिक्षाको विकाससँगै विद्यार्थीहरूको शारीरिक तथा मानसिक विकास पनि उत्तिकै आवश्यक रहेको बताउनुभयो । उहाँले विद्यार्थीको सर्वाङ्गीण विकासका लागि विद्यालय तहदेखि नै खेलकुदलाई प्राथमिकता दिनुपर्ने धारणा राख्नुभयो ।
विद्यालयका प्रिन्सिपल शोभा वाग्लेको सभापतित्वमा सम्पन्न कार्यक्रममा सोही खेलकुद सप्ताह कार्यक्रममा सोही विद्ययालयका प्राचार्य अच्युत हुमगाईले स्वागत मन्तब्य राखेका थिए । विद्यालयले आयोजना गरेको खेलकुद सप्ताहले विद्यार्थीमा खेलप्रतिको रुचि बढाउनुका साथै प्रतिभा पहिचान, अनुशासन र आपसी सहकार्यको भावना विकास गर्न सहयोग पुग्ने अपेक्षा गरिएको छ ।

ताजा खबर

स्थानीय