चन्द्रनिगाहपुरस्थित सहकारी संस्थामा चोरी, २१ लाखभन्दा बढी नगद र उपकरण हराए

स्थानीय

मंगलबार, भदौ ३०, २०८३

चन्द्रनिगाहपुरस्थित सहकारी संस्थामा चोरी, २१ लाखभन्दा बढी नगद र उपकरण हराए

रौतहट, ३० भदौ
रौतहटको चन्द्रपुर नगरपालिका–४ चन्द्रनिगाहपुरस्थित सङ्कल्प बचत तथा ऋण सहकारी संस्था लिमिटेडमा चोरी भएको घटनाप्रति रौतहट बचत तथा ऋण सहकारी संघ लिमिटेडले गम्भीर ध्यानाकर्षण जनाएको छ । संघका अध्यक्ष बिमु कुमार पोखरेल तथा महासचिव देवबहादुर सापकोटा द्वारा जारी प्रेस विज्ञप्तिअनुसार गत भदौ २८ गते राति अज्ञात समूहले सहकारी संस्थाको कार्यालयको ताला फुटाएर चोरी गरेका हुन् । कार्यालय बन्द रहेको समयमा भएको उक्त घटनामा संस्थाको सेफ (तिजोरी) मा रहेको नगद रु. २१ लाख ६१ हजार ५३४ र केही महत्वपूर्ण प्राविधिक उपकरण चोरी भएको प्रारम्भिक जानकारी प्राप्त भएको जनाइएको छ । घटनाबारे जानकारी प्राप्त हुनासाथ संस्थाका पदाधिकारीले इलाका प्रहरी कार्यालय चन्द्रनिगाहपुरलाई खबर गरेका थिए । हाल प्रहरीले घटनास्थलको मुचुल्का उठाउने तथा अनुसन्धान कार्य सुरु गरेको छ । साथै, कार्यालयमा जडान गरिएको सिसिटिभी क्यामेराको फुटेज पनि अनुसन्धानका लागि प्रहरीलाई उपलब्ध गराइएको बताइएको छ ।
रौतहट बचत तथा ऋण सहकारी संघले सहकारीका सदस्य, बचतकर्ता तथा सरोकारवालालाई धैर्य रहन आग्रह गर्दै संस्थाको आन्तरिक लेखा तथा प्रविधि प्रणाली सुरक्षित रहेको र सदस्यहरूको बचत तथा तथ्यांकमा कुनै असर नपरेको स्पष्ट पारेको छ । संघले घटनामा संलग्न व्यक्तिहरूलाई कानुनी दायरामा ल्याई चोरी भएको धनमाल फिर्ता गराउन प्रहरी प्रशासनसँग समन्वय भइरहेको जनाएको छ । साथै, शंकास्पद गतिविधि देखिएमा नजिकको प्रहरी कार्यालय वा सहकारी संस्थालाई जानकारी गराउन सर्वसाधारणसँग आग्रह गरिएको छ ।