चन्द्रपुरमा पशुमा रोग फैलिएको आशंका, गाई मरेपछि स्थानीय चिन्तित

स्थानीय

सोमबार, भदौ २९, २०८३

चन्द्रपुरमा पशुमा रोग फैलिएको आशंका, गाई मरेपछि स्थानीय चिन्तित

रौतहट, २९ भदौ — चन्द्रपुर नगरपालिकाको दक्षिणी क्षेत्रमा पशुहरूमा अज्ञात रोग फैलिएको आशंका गरिएको छ। पछिल्लो एक सातादेखि पशुहरूमा देखिएको रोगका कारण गाई मर्न थालेपछि स्थानीय किसान चिन्तित बनेका छन्।चन्द्रपुर नगरपालिका–९ मा केदार भुजेल र बालकृष्ण गौतमले पालेका गाई रोगका कारण मरेको स्थानीय गोपाल चौलागाईंले जानकारी दिनुभयो। उहाँका अनुसार पछिल्लो केही दिनदेखि पशुहरूमा अस्वस्थता देखिन थालेको र समयमै उपचार तथा रोगको पहिचान हुन नसक्दा गाई मरेका हुन्।स्थानीयले पशुहरूमा फैलिएको रोगको तत्काल परीक्षण गरी आवश्यक उपचार तथा नियन्त्रणका उपाय अपनाउन पशु चिकित्सक र सम्बन्धित निकायसँग माग गरेका छन्।समयमै पशु चिकित्सकहरूले ध्यान नदिए रोग अन्य पशुहरूमा समेत फैलिन सक्ने खतरा रहेको स्थानीय चौलागाईंको भनाइ छ। स्थानीयले पशुमा देखिएको समस्याबारे तत्काल अनुगमन गरी किसानलाई आवश्यक उपचार सेवा उपलब्ध गराउन आग्रह गरेका छन्।