संकल्प साकोसको कार्यालयमा चोरी, भल्ट फोडेर २१ लाखभन्दा बढी नगद चोरी

स्थानीय

आइतबार, भदौ २८, २०८३

संकल्प साकोसको कार्यालयमा चोरी, भल्ट फोडेर २१ लाखभन्दा बढी नगद चोरी

चन्द्रनिगाहपुर, रौतहट — २८ भदौ २०८३, आइतबार।रौतहटको चन्द्रनिगाहपुरस्थित संकल्प बचत तथा ऋण सहकारी संस्था लि. (संकल्प साकोस) को कार्यालयमा चोरी भएको छ। आइतबार बिहान कार्यालय खोल्ने क्रममा चोरी भएको घटना सार्वजनिक भएको हो। चोरले सहकारी संस्थाको भल्ट फोडेर भल्टमा राखिएको नगद रु. २१ लाख ६१ हजार ५३४ चोरी गरेको प्रारम्भिक जानकारी प्राप्त भएको छ। साथै, कार्यालयमा जडान गरिएको सीसी क्यामेराको डीभीआर/रेकर्डिङ डिभाइससमेत चोरी भएको बताइएको छ।
चोरीको घटना शुक्रबार राति वा शनिबार राति भएको हुनसक्ने अनुमान गरिए पनि यकिन समय भने खुल्न सकेको छैन।घटनाबारे जानकारी पाएलगत्तै प्रहरी टोली घटनास्थलमा पुगेर स्थलगत निरीक्षण तथा मुचुल्का तयार गरी अनुसन्धान प्रक्रिया अगाडि बढाएको छ। प्रहरीले घटनामा संलग्न व्यक्तिको पहिचान तथा चोरी भएको रकम र सामग्रीको खोजीका लागि अनुसन्धान गरिरहेको जनाएको छ।घटनाबारे संकल्प साकोसका सचिव चिरञ्जीवी गौतमले जानकारी गराउनुभएको हो।