रौतहट बचत तथा ऋण सहकारी संघ सर्वोत्कृष्ट संघका रूपमा सम्मानित

राष्ट्रिय

सोमबार, भदौ १, २०८३

रौतहट बचत तथा ऋण सहकारी संघ सर्वोत्कृष्ट संघका रूपमा सम्मानित

जनकपुरधाम ३१ साउन । नेपाल बचत तथा ऋण केन्द्रीय सहकारी संघ लिमिटेड -नेफ्स्कून)को ३९औँ स्थापना दिवसको अवसरमा रौतहट बचत तथा ऋण सहकारी संघ लिमिटेड सर्वोत्कृष्ट संघका रूपमा पुरस्कृत तथा सम्मानित भएको छ । सहकारी अभियानको सशक्तीकरण, संस्थागत विकास तथा जिल्लामा सकारात्मक सहकारी संस्कार निर्माणमा संघले पु¥याएको योगदानको उच्च मूल्यांकन गर्दै सम्मान प्रदान गरिएको हो । सर्वोत्कृष्ट संघको सम्मान प्राप्त भएपछि रौतहट बचत तथा ऋण सहकारी संघले यसलाई आफूहरूको सामूहिक प्रयास र निरन्तर प्रतिबद्धताको परिणाम भएको जनाएको छ । संघका अनुसार राम्रो नियत, स्पष्ट ध्येय र सामूहिक प्रतिबद्धताका साथ अघि बढे असम्भव केही छैन भन्ने कुराको ज्वलन्त उदाहरणका रूपमा यो उपलब्धिलाई लिन सकिन्छ । विगत वर्षदेखि रौतहट जिल्लामा सहकारी सशक्तीकरण, संस्थागत सुशासन तथा सहकारीप्रतिको सकारात्मक बुझाइ अभिवृद्धिका लागि संघले विभिन्न गतिविधि सञ्चालन गर्दै आएको थियो । ती प्रयासको परिणामस्वरूप प्राप्त सम्मानले आगामी दिनमा थप जिम्मेवारीका साथ काम गर्न प्रेरणा मिलेको संघले जनाएको छ । ऐतिहासिक उपलब्धि हासिल गर्न प्रत्यक्ष तथा अप्रत्यक्ष रूपमा अहोरात्र खटिने सञ्चालक समिति, कर्मचारी, शेयर सदस्य तथा शुभचिन्तकहरूप्रति संघले हार्दिक कृतज्ञता व्यक्त गरेको छ । प्रारम्भिक संस्थाहरू, सम्बन्धित संस्थाका व्यवस्थापन टोली, सञ्चारकर्मी, नागरिक समाज तथा सहकारी अभियानसँग जोडिएका सबै पक्षको निरन्तर विश्वास, समर्पण र सहकार्यले सफलता सम्भव भएको संघको भनाइ छ । रौतहट बचत तथा ऋण सहकारी संघका अध्यक्ष विभु पोखरेलले प्राप्त सम्मानलाई संघको उपलब्धिभन्दा पनि जिल्लाको समग्र सहकारी अभियानको सम्मानका रूपमा लिएको बताउनुभयो । उहाँले आगामी दिनमा सहकारी अभियानलाई अझ सशक्त, अनुशासित, पारदर्शी र मर्यादित बनाउन संघ निरन्तर प्रतिबद्ध रहने उल्लेख गर्नुभयो । अध्यक्ष पोखरेलले सहकारी संस्थाहरूबीच सहकार्य, क्षमता विकास, सुशासन र सदस्यकेन्द्रित सेवामा थप सुधार गर्दै जिल्लाको सहकारी क्षेत्रलाई नमुना बनाउने दिशामा संघले आफ्नो भूमिका अझ प्रभावकारी बनाउने प्रतिबद्धता व्यक्त गर्नुभयो । ३९औँ स्थापना दिवसका अवसरमा प्राप्त यस सम्मानले रौतहटको सहकारी क्षेत्रमा नयाँ उत्साह र ऊर्जा थपेको छ। साथै, सहकारी संस्थाहरूलाई जिम्मेवार, व्यवस्थित र सेवामुखी ढंगले अघि बढ्न थप प्रेरणा मिलेको सरोकारवालाहरूले बताएका छन् ।