नमुना सामुदायिक वनमा जंगलभित्रै काठ चिरान, स्थानीयद्वारा छानबिनको माग

राष्ट्रिय

बिहीबार, असोज ८, २०८३

नमुना सामुदायिक वनमा जंगलभित्रै काठ चिरान, स्थानीयद्वारा छानबिनको माग

रौतहट, चन्द्रपुर ८असोज । रौतहटको चन्द्रपुर नगरपालिका–जुडिबेलास्थित नमुना सामुदायिक वन क्षेत्रमा जंगलभित्रै काठ चिरान हुँदा सम्बन्धित निकाय बेखबर बनेको छ । स्थानीयका अनुसार सामुदायिक वन क्षेत्रभित्र काठ चिरान गरी फल्याक बनाउदै तस्करी हुँदासमेत वन कार्यालय बेखबर बनेको हो। जंगलभित्र चिरान गरिएका काठका फल्याकहरू भेटिएको भन्दै स्थानीयले यस विषयमा तत्काल स्थलगत अनुगमन गरी सत्यतथ्य सार्वजनिक गर्न माग गरेका छन्। स्थानीयले सामुदायिक वन उपभोक्ता समिति निष्क्रिय रहेको र सम्बन्धित वन कार्यालयबाट समेत प्रभावकारी निगरानी हुन नसकेको आरोप लगाएका छन्। वन क्षेत्रभित्र काठ काट्ने तथा चिरान गर्ने कार्य भए पनि सम्बन्धित निकायको नियमित अनुगमन र नियन्त्रण कमजोर रहेको उनीहरूको गुनासो छ। उनीहरूले चिरान गरिएका काठको स्रोत, प्रजाति, परिमाण तथा चिरानमा संलग्न व्यक्तिको पहिचान गरी आवश्यक कारबाही गर्न माग गरेका छन्। वन क्षेत्रभित्र काठ चिरान भएको सूचना पाएपछि सम्बन्धित वन कार्यालयले तत्काल टोली परिचालन गरी स्थलगत निरीक्षण गर्नुपर्ने स्थानीयको भनाइ छ। साथै, सामुदायिक वन उपभोक्ता समितिको भूमिका, वन व्यवस्थापन तथा संरक्षणमा भइरहेको गतिविधिबारे समेत छानबिन गर्नुपर्ने उनीहरूले बताएका छन्। घटनाबारे सम्बन्धित वन कार्यालयको आधिकारिक धारणा भने सार्वजनिक हुन बाँकी छ। स्थानीयले वन क्षेत्रमा भइरहेको गतिविधिको निष्पक्ष छानबिन गरी दोषी देखिए कानुनअनुसार कारबाही र वन संरक्षणमा प्रभावकारी निगरानी व्यवस्था गर्न माग गरेका छन्।

ताजा खबर

राष्ट्रिय