चन्द्रपुरमा निःशुल्क आँखाको शल्यक्रियापछि ६३ वर्षीय राईको दैनिकी फेरियो

स्थानीय

मंगलबार, भदौ २, २०८३

चन्द्रपुरमा निःशुल्क आँखाको शल्यक्रियापछि ६३ वर्षीय राईको दैनिकी फेरियो

रौतहट २ भाद्र
रौतहटको चन्द्रपुर नगरपालिका–२ जुडिबेलाका ६३ वर्षीय सुखबहादुर राईको निःशुल्क आँखाको शल्यक्रियापछि दैनिकी फेरिएको छ । विगत ६ महिनादेखि आँखाको ज्योति कमजोर भएपछि घरको आँगनबाट समेत बाहिर निस्कन नसक्ने अवस्थामा रहेका राई अहिले नातिनातिनीसँग रमाउँदै खेल्न सक्ने भएका छन् । आँखा कमजोर हुँदै गएपछि हिँडडुल गर्न अरूको हात समात्नुपर्ने अवस्था आएपछि राई घरमै बस्न बाध्य थिए । उनको अवस्था देखेपछि स्थानीय महिला स्वास्थ्य स्वयंसेविकाले आँखा जाँच गराउन सुझाव दिएकी थिइन् । सोही क्रममा तिलगंगा आँखा प्रतिष्ठानको तिलगंगा सामुदायिक आँखा केन्द्र, चन्द्रपुरमा पुगेर आँखा जाँच गराएपछि उनलाई तिलगंगा सामुदायिक आँखा अस्पताल निजगढमा निःशुल्क शल्यक्रियाका लागि पठाइएको थियो । अस्पतालमा गरिएको शल्यक्रिया सफल भएपछि राईको दृष्टिमा सुधार आएको छ। दृष्टिमा सुधार आएपछि उनी निकै खुसी भएका छन् । पाँच छोरा र दुई छोरीका बुवा राई हाल कान्छी बुहारी सुमित्रासँग बस्दै आएका छन्। उनका छोराहरू ज्याला मजदुरीका लागि काठमाडौं र पोखरामा छन्। आर्थिक अवस्था कमजोर भएकाले आँखाको समस्या हुँदासमेत राई सामान्य ज्याला मजदुरी गर्दै आएका थिए । दृष्टि कमजोर भएका कारण लामो समयसम्म नातिनातिनीलाई राम्रोसँग देख्न नसक्दा दुःखी रहेका राई अहिले चस्मा लगाएर उनीहरूसँगै खेल्दै रमाउने गरेका छन् । लामो समयपछि नातिनातिनीलाई नजिकबाट देख्न पाएकोमा आफू निकै खुसी भएको राईले बताएका छन् ।