सर्वोच्चबाट पनि निलम्बित मेयर यादवलाई राहत मिलेन

स्थानीय

मंगलबार, असोज ६, २०८३

सर्वोच्चबाट पनि निलम्बित मेयर यादवलाई राहत मिलेन

रौतहट ६ असोज
रौतहटको फतुवा विजयपुर नगरपालिकाका निलम्बित मेयर गोपाल राय यादवविरुद्ध विशेष अदालतले सुनाएको भ्रष्टाचार मुद्दाको फैसला सर्वोच्च अदालतले पनि कायम गरेको छ । लालबकैया नदीको ढुंगा, गिट्टी र बालुवा ठेक्का प्रकरणमा विशेष अदालतको फैसलाविरुद्ध यादवले दिएको पुनरावेदन सर्वोच्च अदालतले सोमबार अस्वीकार गरेको हो। न्यायाधीश सपना प्रधान मल्ल र महेश शर्मा पौडेलको संयुक्त इजलासले पुनरावेदनका लागि पर्याप्त आधार नदेखिएको आदेश दिएको छ । यससँगै यादवलाई सुनाइएको तीन वर्ष कैद र १५ लाख रुपैयाँ जरिवाना कायम भएको छ । अख्तियार दुरुपयोग अनुसन्धान आयोगले आर्थिक वर्ष २०७५/७६ मा नदीजन्य पदार्थको ठेक्कामा अनियमितता भएको भन्दै यादवसहित २१ जनाविरुद्ध मुद्दा दायर गरेको थियो। ठेक्का प्रक्रियाका कारण स्थानीय तहलाई एक करोड ५३ लाख रुपैयाँभन्दा बढी नोक्सानी भएको अख्तियारको दाबी थियो । विशेष अदालतले यादवलाई मात्र दोषी ठहर गर्दै अन्य २० जनालाई सफाइ दिएको थियो। लालबकैया नदीको ठेक्का फतुवा विजयपुर र गुजरा नगरपालिकाले संयुक्त रूपमा लगाउने तथा आम्दानी ६० र ४० प्रतिशतका दरले बाँड्ने व्यवस्था थियो । यसैबीच, आगामी स्थानीय तह निर्वाचनमा आफ्नो राजनीतिक प्रभाव कायम राख्न यादवले छोरालाई उम्मेदवार बनाउने तयारी गरिरहेको स्थानीय राजनीतिक वृत्तमा चर्चा छ। यद्यपि, यसबारे औपचारिक उम्मेदवारी भने स्पष्ट भइसकेको छैन ।