जनज्योति बहुमुखी क्याम्पसको अध्यक्षमा तीन जनाको उम्मेदवारी

स्थानीय

मंगलबार, भदौ ९, २०८३

जनज्योति बहुमुखी क्याम्पसको अध्यक्षमा तीन जनाको उम्मेदवारी

रौतहट ९ भदौ
रौतहटको चन्द्रपुर नगरपालिका–६, चन्द्रनिगाहपुरस्थित जनज्योति बहुमुखी क्याम्पसको सञ्चालक समिति अध्यक्ष पदका लागि तीन जनाको उम्मेदवारी परेको छ । निर्वाचन संयोजक दिपेन्द्र कुमार मण्डलले सार्वजनिक गरेको निर्वाचन कार्यतालिकाअनुसार मंगलबार बिहान १० बजेदेखि दिउँसो १ः३० बजेसम्म उम्मेदवारी मनोनयन दर्ताको समय तोकिएको थियो । निर्धारित समयभित्र अध्यक्ष पदका लागि संजय कुमार कार्की, प्रमिला उपाध्याय र बालकृष्ण श्रेष्ठले उम्मेदवारी दर्ता गराएका छन् ।
निर्वाचन कार्यतालिकाअनुसार मंगलबार दिउँसो २ बजेदेखि ५ बजेसम्म उम्मेदवारी फिर्ताको समय तोकिएको छ। त्यसपछि साँझ ५ बजेदेखि ५ः३० बजेसम्म उम्मेदवारविरुद्ध दाबी–विरोधका लागि समय निर्धारण गरिएको छ । अन्तिम उम्मेदवारको नामावली भने साँझ ६ बजे प्रकाशन गरिने निर्वाचन समितिले जनाएको छ । अध्यक्ष पदमा तीनै जनाको उम्मेदवारी कायम रहे बुधबार त्रिपक्षीय प्रतिस्पर्धा हुने भएको छ। कार्यतालिकाअनुसार भदौ १० गते बुधबार बिहान ८ बजेदेखि दिउँसो १ बजेसम्म मतदान हुनेछ ।
क्याम्पस सञ्चालक समिति निर्वाचनमा कुल ६६ जना मतदाताले मतदान गर्न पाउनेछन् । उम्मेदवारी दर्तासँगै क्याम्पसको आगामी नेतृत्व चयनलाई लिएर चुनावी माहोलसमेत तातेको छ । निर्वाचनबाट चयन हुने अध्यक्षले क्याम्पसको प्रशासनिक तथा शैक्षिक नेतृत्वमा महत्वपूर्ण भूमिका निर्वाह गर्ने भएकाले यस निर्वाचनलाई चासोका साथ हेरिएको छ ।