जनज्योती बहुमुखी क्याम्पसको १४ औँ क्याम्पस सभाको उद्द्धाटन सत्र सम्पन्न

स्थानीय

सोमबार, भदौ ८, २०८३

जनज्योती बहुमुखी क्याम्पसको १४ औँ क्याम्पस सभाको उद्द्धाटन सत्र सम्पन्न

चन्द्रनिगाहपुर ८ भदौ
रौतहटको चन्द्रपुर नगरपालिका–६ चन्द्रनिगाहपुरस्थित जनज्योती बहुमुखी क्याम्पसको १४ औँ क्याम्पस सभा तथा २५ औँ रजत जयन्ती समारोह सम्पन्न भएको छ । मधेश प्रदेशका अर्थमन्त्री युवराज भट्टराई ‘समीर’को प्रमुख आतिथ्यतामा सम्पन्न उद्घाटन समारोहमा पूर्वसंविधानसभा सदस्य देवेन्द्र पटेल, चन्द्रपुर नगरपालिकाका नगर प्रमुख सञ्जय काफ्ले लगायतको सहभागिता रहेको थियो । कार्यक्रममा क्याम्पसको वार्षिक कार्यक्रम तथा प्रगति प्रतिवेदन प्रस्तुत गरिएको थियो । सञ्चालक समितिका अध्यक्ष सञ्जय कुमार कार्कीले सञ्चालक समितिको तर्फबाट वार्षिक कार्यक्रम प्रतिवेदन प्रस्तुत गर्नुभएको थियो । त्यसैगरी क्याम्पस प्रमुख राजन श्रेष्ठले क्याम्पसको वर्तमान अवस्था, भौतिक पूर्वाधार, सञ्चालित तह तथा विषयलगायतका विषय समेटिएको प्रतिवेदन प्रस्तुत गर्नुभएको थियो । उहाँका अनुसार हाल जनज्योती बहुमुखी क्याम्पसमा विभिन्न तहमा गरी २ हजार ८ सय ७४ जना विद्यार्थी अध्ययनरत छन् । कार्यक्रममा क्याम्पसको आर्थिक अवस्थाबारे कोषाध्यक्ष चिरञ्जीवी गौतमले आर्थिक प्रतिवेदन प्रस्तुत गर्नुभएको थियो । उहाँले क्याम्पसको आय–व्यय तथा आर्थिक गतिविधिबारे सभालाई जानकारी गराउनुभएको थियो । क्याम्पसको २५ औँ रजत जयन्ती तथा १४ औँ क्याम्पस सभाको अवसरमा प्रकाशित ‘जनज्योती स्मारिका’ तथा ‘जनज्योती एकेडेमिक जर्नलको औपचारिक विमोचन प्रमुख अतिथि अर्थमन्त्री युवराज भट्टराई ‘समीर’ले गर्नुभएको थियो । कार्यक्रममा क्याम्पसको शैक्षिक तथा भौतिक विकास, आगामी कार्ययोजना र संस्थागत सुधारका विषयमा समेत छलफल भएको थियो ।
यसैबीच, क्याम्पस सभाले नयाँ सञ्चालक समिति चयनको प्रक्रिया अघि बढाएको छ । नयाँ सञ्चालक समिति चयन गर्ने गरी बन्दसत्र सुरु भएको र समाचार तयार पार्दासम्म बन्दसत्र निरन्तर चलिरहेको क्याम्पस प्रशासनले जनाएको छ । नयाँ समितिले क्याम्पसको शैक्षिक गुणस्तर अभिवृद्धि, पूर्वाधार विकास तथा विद्यार्थीमैत्री वातावरण निर्माणमा थप भूमिका खेल्ने अपेक्षा गरिएको छ ।