रौतहटको जनभावना आधारभूत विद्यालयमा लालबहादुर कुश्वारको अध्यक्षतामा नयाँ व्यवस्थापन समिति गठन

राष्ट्रिय

शुक्रबार, भदौ १२, २०८३

रौतहटको जनभावना आधारभूत विद्यालयमा लालबहादुर कुश्वारको अध्यक्षतामा नयाँ व्यवस्थापन समिति गठन

रौतहटको चन्द्रपुर नगरपालिका वडा नम्बर–६ माझिटोलस्थित श्री जनभावना आधारभूत विद्यालयमा बिहीबार आयोजित एक कार्यक्रमका बीच लालबहादुर कुश्वारको अध्यक्षतामा ७ सदस्यीय विद्यालय व्यवस्थापन समिति गठन गरिएको छ। शैक्षिक योग्यता र सामुदायिक विद्यालयप्रतिको लगावलाई प्राथमिकता दिँदै वडा अध्यक्ष सहदेव केसीको नेतृत्वमा गठित उक्त समितिमा संगीता चौधरी, महेश राम, रमा विश्वकर्मा, शिक्षक प्रतिनिधि पूजा गुरुङ र प्रधानाध्यापक विश्वनाथ प्रसाद साह सदस्य रहेका छन्। कार्यक्रममा बोल्दै वडा अध्यक्ष केसीले राज्यले पोसाक, दिवा खाजा, किताब र छात्रवृत्तिमा करोडौँ लगानी गर्दा पनि अभिभावकहरू निजी विद्यालयतर्फ आकर्षित हुनु चिन्ताजनक रहेको र सरकारी लगानी बालुवामा पानीजस्तै भइरहेको बताए। सामुदायिक विद्यालयको शैक्षिक सुधारका लागि जनप्रतिनिधि, शिक्षक र समिति सदस्यहरूले आफ्ना बालबालिकालाई अनिवार्य रूपमा सरकारी विद्यालयमै पढाउनुपर्ने र अभिभावकहरूले विद्यालयका कमजोरी सुधार्दै आफ्ना नानीबाबुलाई सामुदायिक विद्यालयमै पठाउनुपर्नेमा उनले जोड दिए।